ຄະນະພັກຮາກຖານພະແນກ ສຶກສາທິການ ແລະກິລາແຂວງສາລະວັນສໍາເລັດກອງປະຊຸມໃຫ່ຍຄັ້ງທີ IV.ເຊີ່ງໄດ້ຈັດຂື້ນໃນວັນທີ 24ກຸມພາ 2025ນີ້ທີ່ສະໂມສອນໂຮງຮຽນວິທະໄລຄູສາລະວັນ. ໂດຍການເປັນປະທານຂອງ ສະຫາຍ ສຸນີ ນາມມະບົວລີ ເລຂາຄະນະພັກຮາກຖານຫົວໜ້າພະແນກ ສຶກສາທິການ ແລະກິລາແຂວງສາລະວັນ,ເປັນກຽດເຂົ້າຮ່ວມຂອງສະຫາຍ ສົມໃຈ ອຸ່ນຈິດ ຄະນະປະຈໍາພັກແຂວງ ຮອງເຈົ້າແຂວງ ຫົວໜ້າອະນຸກໍາມະການເນື້ອໃນຂັ້ນແຂວງ,ມີສະຫາຍໃນຄະນະພັກຮາກຖານ,ເລຂາໜ່ວຍພັກ-ຄະນະໜ່ວຍທີ່ຂື້ນກັບຄະນະພັກຮາກຖານພະແນກ,ອະນຸກໍາມະການເນື້ອໃນ,ພະແນກການທີ່ກ່ຽວຂ້ອງ,ສະມາຊິກພັກເຂົ້າຮ່ວມ.
ກອງປະຊຸມຄັ້ງນີ້ເຂົ້າຮ່ວມໄດ້ຮັບຟັງການລາຍງານຜົນສຳເລັດໃນການເຄື່ອນ ໄຫວນໍາພາ-ຊີ້ນໍາຂອງໜ່ວຍພັກ ຕະຫຼອດໄລຍະ 5 ປີຜ່ານມາ ຍົກໃຫ້ເຫັນດ້ານດີທີ່ມີລັກສະນະຕັ້ງໜ້າ, ດ້ານອ່ອນ-ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ ເຊິ່ງໄລຍະຜ່ານມາໄດ້ເອົາໃຈໃສ່ຖືເອົາວຽກງານການເມືອງແນວຄິດເປັນກົກ ແລະ ເປັນວຽກສໍາຄັນ ,ສຶກສາອົບຮົມການເມືອງ-ແນວຄິດໃຫ້ສະມາຊິກພັກ, ພະນັກງານ-ລັດຖະກອນ ໃຫ້ມີຄວາມຕື່ນຕົວປ່ຽນແປງໄປໃນທາງທີ່ດີ, ມີຄຸນທາດການເມືອງໜັກແໜ້ນ, ມີນ້ຳໃຈບຸກບືນປະຕິວັດທີ່ຖືກຕ້ອງ, ມີຄວາມຈົ່ງຮັກພັກດີຕໍ່ອຸດົມການຂອງພັກ, ມີນໍ້າໃຈເສຍສະຫຼະ, ມີຄວາມສາມັກຄີເປັນເອກະພາບພາຍໃນພ້ອມກັນສຸມໃສ່ການຈັດຕັ້ງປະຕິບັດໜ້າທີ່ການເມືອງ. ນອກນັ້ນ ຍັງໄດ້ເອົາໃຈໃສ່ນໍາພາ-ຊີ້ນໍາວຽກງານວິຊາສະເພາະເປັນຕົ້ນ ທົ່ວແຂວງມີພະນັກງານລັດຖະກອນ ( ຄູ ແລະບໍລິຫານ )ທັງໜົດ 3.770 ສະຫາຍ,ຍິງ 1.967ສະຫາຍ,ຄຽງຄູ່ກັບການສຶກສາໃນໂຮງຮຽນແລ້ວ ການສຶກສານອກໂຮງຮຽນ ກໍ່ໄດ້ຈັດຕັ້ງການຮຽນ-ການສອນລຶບລ້າງຄວາມບໍ່ຮູ້ໜັງສືໃນເກນອາຍຸ 6–14ປີ ແລະ 15-40ປີ ພ້ອມກັບຝຶກອົບຮົມວິຊາຊີບຂັ້ນພື້ນຖານເພີ່ມຂື້ນເປັນ 8.312 ຄົນ,ການສຶກສາຫຼັງສາມັນສຶກສາບັນດາຊາວໜຸ່ມ ໄດ້ສືບຕໍ່ເຂົ້າຮຽນໃນລະດັບວິຊາຊີບທັງພາຍໃນແຂວງ ແລະຕ່າງແຂວງໃນ 5ປີຜ່ານມາມີນັກຮຽນວິຊາຊີບພາຍໃນແຂວງຈໍານວນ 2.397ຄົນ,ການສຶກສາລະດັບວິຊາຊີບໄດ້ມີການສ້າງຕັ້ງໂຮງຮຽນເອກະຊົນ 1 ແຫ່ງ,ວຽກງານກິລາກາຍະກໍາແມ່ນເປັນວຽກໃນຍຸດທະສາດຂອງການພັດທະນາຊັບພະຍາກອນມະນຸດ ແລະເຊື່ອມສານເຂົ້າໃນວຽກງານການສືກສາຕາມ 3 ລັກສະນະ,5ຫຼັກມູນການສຶກສາຂອງພັກ,ນັກກິລາ,ຄູຝຶກໄດ້ຮັບການຍົກລະດັບ,ໂຄງລ່າງພື້ນຖານດ້ານການກິລາຂະຫຍາຍຕົວໄປທຸກເມືອງ ສາມາດສ້າງໄດ້ນັກກິລາຕົວແທນຂອງແຂວງເຂົ້າຮ່ວມງານແຂ່ງຂັນລະດັບຊາດ,ພິເສດໃນປີ 2024 ແຂວງສາລະວັນແມ່ນໄດ້ຮັບກຽດເປັນເຈົ້າພາບງານມະຫາກໍາກິລານັກຮຽນມັດທະຍົມສຶກສາຄັ້ງທີ 7 ເຊີ່ງເປັນເຫດການທາງການເມືອງ ແລະເປັນປະຫັວດສາດຂອງແຂວງ ຜ່ານການເຂົ້າຮ່ວມແຂ່ງຂັນ ແຂວງສາລະວັນກໍ່ສາມາດຍາດໄດ້ອັນດັບ 3 ໃນທົ່ວປະເທດ.
ໃນກອງປະຊຸມຍັງໄດ້ຜ່ານຮ່າງແຜນພັດທະນາວຽກງານການສຶກສາ-ກິລາ,ຮ່າງບົດສຳຫຼວດການນຳພາລວມຂອງຄະນະພັກຮາກຖານ, ຜ່ານມາດຖານເງື່ອນໄຂຜູ້ສະໝັກເລືອກຕັ້ງຄະນະພັກຮາກຖານຊຸດໃໝ່, ເຊີ່ງມີຜູ້ສະໝັກທັງໝົດ 9 ສະຫາຍ, ເລືອກເອົາ 7 ສະຫາຍ,
ກອງປະຊຸມຄັ້ງປະຖົມມະລຶກໄດ້ເຫັນດີຄັດເລືອກເອົາ ສະຫາຍ ສຸນີ ນາມມະບົວລີ ເປັນເລຂາຄະນະພັກຮາກຖານ,ສະຫາຍຄໍາເຟືອງ ອິນທິສອນເປັນຮອງເລຂາ,ສະຫາຍ ນາງ ພູວຽງ ອິນທະສອນ,ສະຫາຍ ແອບີຊານ ລ້ານນາຂວາງ,ສະຫາຍ ໄພວັນ ແສງອໍາພັນ,ສະຫາຍ ວຽງແກ້ວ ຈັນເບັງແສງ ແລະສະຫາຍ ສິດທິເດດ ຈັນທະບຸດດີ ເປັນຄະນະພັກຮາກຖານ. ຈາກນັ້ນ ໃນຕອນທ້າຍຂອງກອງປະຊຸມກໍ່ໄດ້ຮັບຟັງການມີຄຳເຫັນໂອ້ລົມ ຊີທິດເຢືອງທາງຈາກປະທານຕື່ມອີກ.
ພາບແລະຂ່າວໂດຍແກ້ວິໄລ ດວງຄຳ
